Wikizzionari:Vandalismo

Questa pagina del Wikizzionari chì l'è scrivuda in lombard, con la Noeuva Ortografia Lombarda

A se ciama vandalismo la sgionta, la scancelazzion o la modifega de contenud e dati, fada con un interess o ona malafed duvis e col risultad conseguent de comprometer el Wikizzionari.

Di volte chi opera on vandalismo el gh'ha on’upinion cativa (o l'è tirad dent personalment) sora el tema de la vos, ma l’è minga bon o 'l voeul nò discuten polit. De solit di utent de ‘sta razza chì i meten dent o rimpiazzen el test esistent con oscenità, parollasce, contegnud senza sens o informazzion che con evidenza manden foeura de strada o che gh’entren minga. Di alter volte, inveci de ostinad i scancellen di paragraf che corrisponden nò ai so manere de vedé, di alter volte animò i meten denter replicatament di contenud de reclam, setari o ofensiv per quaichedun.

Qualsessia contribuzzion fada in bona fed cont el fin de mijorà el dizzionari, anca se l'è fada in manera sbajada o de strafusari, al’è minga de vess considerad 'me on vandalismo. A se conosideren nò 'me on vandalismo i intervent indove che la malafed l'è minga riconoscibil subit e senza dubi.

El cometer del vandalismo a l'è naturalment contrari a la politega del Wikizzionari. Donca a l'è necessari che 'l vandalismo el sia inanz de tut reconossud e in seguit gestid; se a sii minga bon de gestìll in depervialter podii cercà el jut de alter wikizzionarista e soratut di aministrador.

Tant 'me 'l meter denter di contegnud senza scrima, di imagin ofensive e di ciallade d'ogni sorta l'è sossenn fazzil per tucc , al'è altretant fazzil per ogni utent, anche se nanca registrad, de giustà i dagn. Anzi, tut i utent a inn invidad, qualora che individuen on vandalismo, a toeùll via imediatament, magara cont el toeu contat cont on aministrador qualora che a ghe sia bisogn de azion minga permetude a l'utent (compagn del bloch de la pagina).

'Se l'è on vandalismo

Queste chì a inn i forme pussee comune de vandalismo in sul Wikizzionari:

• Sgionta de ligam-ruf, compagn de la sgionta de ligam de foeura per fin de reclam o vers di sit che gh'entren minga cont on dizzionari onlain.
• Sgionta de parolle senza sens o la scancellazzion minga giustificada de part del test
• Creazzion de vos senza sens o con contegnud scherzos/goliardich
• Inseriment, scancellazzion o modifega de contegnud e dati, fad cont on interess duvis o ona malafed
• Inseriment de informazzion sbajade de proposit
• Inseriment – anca in di pagine de ciciarada – de test sostanzios in lengua foresta per disturbà
• Inseriment de insult e titol
• Inseriment de insult, scancellazzion, ruvina de pagine utent di alter
• Inseriment di imagin provocant o de proposit foeura de post
• Inseriment volontari de modei minga adat o eliminazzion replicada di modei boni
• Spostament de pagine minga giust de proposit

N.B. Ona queivoeuna de ‘ste azzion chì la podariss vesser fada in bona fed de di utent noeuv nananmò prategh del fonzionament del Wikizzionari: valuté semper con atenzion el tipo de modifega e presumé semper la bona fed fina tant che l'è possibil.

Cossa a l'è nò on vandalismo?

Ancaben che di volte a se tiren a man ‘me che se i fudessen di vandalismi, 'ste robe chì a inn minga di vandalismi e siché i gh'hann de minga vesser tratade come tai:

• Proeuve di novei.
  Vergun di utent noeuv che 'l squaja el pulsant "modifega" el voeul savé se 'l pò modifegà debon ogni pagina, per quest el ghe scriv denter on quaicoss domà per provà. Quest-chì a l'è minga vandalismo! Inscambi, 'sti utent chì a gh'havarissen de vesser acetad caldament, e mandad a la pagina di proeuve indove che i poden andà inanz a scriver el sò test. Minga de rar i scancellen quell che lor medem i han fad. In sgener el prim pass per istituì ona bona comunicazzion a l'è el meter l'avis {{proeuva}} (varda chichinscì la sintassi) in de la pagina de ciciarada de l'utent (anca se l’è on IP) .

• Impratichìss con la wiki-sintassi.
  Per certi utent a gh’è bisogn de fa on poo de pratica, inanz de manesgià a dover la sintassi drovada per rediger i vos in sul Wikizzionari e de conosser i convenzion in uso in quant a la manera de impaginà ona vos. Inveci de considerà 'sti utent chì subit 'me di destrugoni, spiegévegh a lor quai i convenzion da adotà, per esempi cont el fàgh vedé l'esempi de compilazzion, la pagina di domande frequente sora la lengua lombarda e, in segneral tute i pagine de ajut.

• Prepotenza e gnucaria.
  Di utent i riessen minga a rivà a on acord con quei ch'i voeulen discuter i modifeghe fade de lor e, de ostinad, rimeten come prima la soa version de lor dopo che di alter a inn intervegnud. Tai situazzion sgeneralment i menen al bloch de pagina contestada, e donca a l'avertura de la procedura per trovà el Consens ma a inn de consideràss nò ‘me vandalismo. A resta intendud che i aministrador a poden servìss del bloch temporani di utent tirad denter in de la quistion qualora che la discussion la gh'havess de desgenerà.

• Molestie e atach personai.
  El Wikizzionari, compagn che tucc i proget Wiki el gh'ha ona politega che la probiss la molestia e l'atach personal. Certe molestie a inn anca vandalismo (per esempi el vandalismo in sui pagine-utent). Se 'l comportament el và inanz, el po vesser util a avisà on aministrador.

• L'imprevist.
  Domà perchè on quaivun el porta di modifeghe assabruta, el significa minga che 'l sia in automatich on destrugon. Magara l'è domà on utent noeuv. Toeu contat con lu e spiegégh com'al'è che 'l gh'havariss de cambià el so comportament. Bolchél nò a priori inanz de vegnì al ciar de quell che l'ha fad.

Come riparà

Per fà in manera che on at de vandalismo el sia pu visibil al'è assee a dervì la storia de la pagina (quarta lingueta in alt) e clicà in su la version prima de quella vandalizada (che, se 'l vandalismo l'è stad ciapad in su l'at, la dovariss vesser la penultima), andà in "modifega", indicà in de l'oget che se trata d'ona inversadura per vandalismo, e donca salvà.
Se l'intervent al'è subitani nó 'l gh'è bisogn de fà alter, condemanch che segnalà a on quai aministrador, in di cas pussee gram, che in de la storia de quella pagina là a gh'è on vandalismo de eliminà.
Se 'l vandalismo fudess scovert despoeu che la pagina l'ha subit tante modifeghe in sucession el segnal a on aministrador al'è necessari per fà in manera de proveder a ona scancelazzion provisoria con restavor di modifeghe anullade in del scassà el vandalismo.